AIA 卓智投資計劃

早一排去左AIA買保險，人壽，危疾，醫療保障通通都買齊的情況下，經紀再強烈推介所謂的儲蓄計畫，而計劃名稱為"卓智投資計劃"。

而本人對於經紀所作出的遊說真係心感佩服，明明計劃上的缺憾都講成優點，以下同大家分享一下。

首先是計劃的本質，由於AIA係香港註冊成為一個保險公司，受法例所限，賣的產品都係圍繞著保險，此計劃亦不例外。保險必定有的，就係期限，而呢個投資計劃亦都一樣，最短五年，最長係75減投保人的年齡。無論供款多少，個個月都要收六美元，一年共72美元或560港元，總收費由2800港元至28000港元(假設投保人為25歲)提供的保障，計劃到期時會全數退還，但大家會有減值的損失。收呢筆錢估計係因為投保人中途身故的話，保險公司需要作出退款及賠償，而賠償額為保單現值的1%。

其次係計劃是一個年期，期內必需按時供款。此計劃有一個安排係整個計劃分成最初供款期及延續供款期，以五年期的計劃為例(合共60個月)，頭18個月為最初供款期，在計劃到期前，所有款項不可退回，假如取消計劃，需要把最初供款期的總額扣除5%至100%作為手續費。為什麼AIA要把手續費定得咁高呢?原因係最初供款期供款係呢個計劃賺錢的部份，AIA會從最初供款期供款每月收取0.375%作為行政費及0.125%的管理費，亦永不退還，若以每月供100美元，經過60個月後，只餘75美元。全數最初供款期供款經過60個月後，大約會被收取402美元或22%。延續供款期(共60-18=42期)只收取0.125%，總數約105美元或2%。總計AIA的可見收費為402+105=507美元，總供款為60x100 = 6000美元，總AIA收費約總供款的8.5%。基金表現至少優於6.5%才可收支平衡(因以上收費假設基金没有增長。如基金增長的話，收費會按比例增加)。

其他還有很多離項收費，如買賣單位以小數後2位計算，差額歸AIA等，轉基金次數多，賠得愈多。其他收費不能逐一講解，大家可參考其小册子。

值得一提的是，基金本身也有大量不同收費，而普通人没有方法可以深入了解細節，很難比較。

除非大家知道計劃期內絶不急於用錢或必定在計劃到期後仍然在世，否則都不應參加這類計劃。

香港 PASONA 學日文

PASONA係一間日本人開的公司，學校只係PASONA的其中一門生意，係佢地個網頁有寫到佢地有做職業介紹，當然係幫日本公司請人為主啦。

PASONA入學都幾繁複，本身一d日文都唔識的話，就可以由Grade 1開始，俾錢就攪掂。但係本身係其他地方學過的話，就要考一個入學試，收費$50左右，根據所得分數被編到不同的Grade，由於原有學生有選班優先權，所以插班生得d上課時間較差的班可選。

分班方面，同日語能力試没有直接的比較，但可以約分為日語能力試NG5等如Grade 1 - 4，日語能力試NG4等如Grade 5-8。讀一個grade大約要4個月時間，PASONA會在每一學期開Grade 1 - 8，grade1的class最多，grade8最少，視乎幾多學生可以升班。

係PASONA學日文真係要夠錢多，學費真係有d貴。根據教統局的要求，學費要逐個月收的，一個grade收三次，一定要自動轉帳，舊生的話，考試前要先用pps交下個grade的第一期學費，呢個安排都小家，驚死d學生轉校咁。

課本為<<大家的日本語>>，兩個grade教完一本書，每個grade再有一本由PASONA編制的補充練習(估計大部份內容係未得版權人同意的情況下複印)，所以每兩個grade要交一次書簿費$250。

上課方面，全部教師都係日本人，所以對文法及生字的運用絶無問題，但係佢地的外語能力極為有限，只有個別老師識英文或普通話，所以課堂上講解有欠清晰，多依賴學生在家閱讀補充練習備課。亦因為老師不懂外語，師生之間是全日語授課，有較多口語練習機會。上課後都有功課的安排，但不是強制完成，亦不影響考試成績，所以缺少推動力。考試只安排選擇題，間接導致學生的書寫力能欠奉，而考試合格分數不高，約40% ~ 50%(因不合格的同學多轉到其他學校就讀而未能得知)。

要claim持續進修基金就要先連續讀4個grade，如grade1-4 or grade 3-6等，出席率夠8成，再在日語能力試任何一級取得合格成績就可以申請，要達到以上要求，大約要$10000，所以要想清楚先報讀。

學校網頁

http://www.pasona.edu.hk/eng/index.aspx

慕尼黑 啤酒屋

呢間係慕尼黑的啤酒屋係當地都算係好出名的，個名叫"Hofbrauhaus"，旅遊書都有介紹到，書話十六世紀已經開張，不過唔理咁多啦，試下有咩食先係最重要。

入到去，四圍都坐滿人，由於没"帶位"呢個服務，所以要自己搵位，其他人一起身就可以坐落去再等人清張檯。

到有張menu之後發現成個menu都係全德文，咩都睇唔明，唔可以跟住本書寫的介紹去試，而相中左邊的係house beer，唔記係咩名lu，果杯野係500ml，唔夠的話，可以order一杯1000ml。右邊叫做cola mix，係beer溝可樂，甜甜地，幾好飲。

之後就係燒豬手，個皮好香脆，唔太咸，咁合中國人口味，但係要講講旁邊果兩個黃色波，係d好"實"的薯仔蓉，食落好膠，一粒就已經好飽肚。

最後係搭檯的德國家庭借我地影相的，又請左我地食少少，叫咩名就唔記得啦，不過係德國南部就好出名的，睇落似麵包，食落似餅乾，如果同當地人傾計的話，佢地一定會叫大家試。

成餐兩杯飲品同一隻豬手，差唔多16歐羅，都幾貴。

屋企d LAN線

買左個新電視同PS3後，發現屋企之前的裝修配合唔到而家d電器要求。

而家間屋係2003年裝修，成間屋有三四個電話位。當時成屋得一部電腦要上網，所以只係諗住電腦放係個ASDL model邊就夠用。

但係而家屋企已經有三部電腦了，放左係兩間房入面，其中一間完全冇電話線同Lan 線，只可以選擇用wifi，其他電腦就好采d，可以放個router同modem係個電腦旁邊，加兩條 patch cord直插上電腦，簡單解決左個問題。

直至新電視同PS3出現，問題又再次出現，電視位又冇LAN 線位，wifi出到廳又唔夠强，成日斷斷續續，想用build in的DLNA function去share電腦d相同電影出電視都唔得，搵左條勁長的patch cord由房拉出廳，但係成10米長，阻住行路，次次用完又要收番好，真係好煩，而小弟都算係cabling的行內人(入行只得兩年)，所以可以俾d 意見大家參考下，下次裝修時有番個預算。

第一，要計算一下全屋有d咩地方同電器要用電話線或上網。建議一間房最少都要有一個電話線口同一個LAN線口。客廳電視位要一至兩個，視乎有幾多野SUPPORT DLNA呢個STANDARD。

第二，要諗下放MODEM同ROUTER的位置，而呢個位最好就做到好似電錶箱咁方便第時做改動，下面張相係d 好ideal gei sample。

由於LAN線唔可以手拖手咁拉，所以所有LAN線到最後都會拉到去ROUTER的位置，所以呢個位要:

i. 有電制

ii. 足夠的空間放d patch cord

iii. 夠散熱

iv. 近街線入屋的位置

v. 最好就空曠d，等d wifi signal cover到屋內多d位

第三，拉電話線方面，想整齊d的話，就要好似LAN線咁，將所有線拉到同一個地方先致做分線，位置就最好同Router放係一齊啦，下面張相係其中一種電話分線器。

第四，所有入牆線兩端都要用d modular jack加面版做個termination，比起直拉夾plug靚仔好多同耐用d。我建議大家全部用哂RJ45 的jack就得，因為電話頭的RJ11plug都可以插入去RJ45 Jack

第五，係牆身走線用到喉千萬不要同電線放係一齊，電話線同LAN線一條喉，電線自己一條喉，咁電話線同LAN線先唔會被干擾，否則前功盡廢，講電話沙沙聲，上網就勁多packet loss。

第六，就係選料方面，最令人難決擇的地方都係用Cat.5e好定係Cat.6好，追求快感的話，就一定係Cat.6啦，部部電腦都support到1Gbit/s，再買個好少少的router，咁放哂d野落個 NAS 度都唔覺慢啦。但用Cat.6線要留意番條喉夠唔夠放d Cat.6線，20mm只可以放到3-4條，太多的話，彎位會好緊。價錢比起Cat.5e都會貴6~7成。

第七，買貨時，千萬唔好俾d裝修師傅買，因為佢地都IT毫無認識，只會買d最平的山寨線俾你。通常d師傅都係俾d叫Samson, 8仔(Eight)或者Clipsal，第時用用下死左都唔知點算。

始終屋企的線都係自己用，買番d大牌子會耐用d，出名的都係AMP同BELDEN，一箱305m Cat.6同Cat.5e線分別約$900~$1000同$500~$600啦。去鴨記”華輝”或者黃金入面間”博志”買。

第八，大家唔怕煩都可以去買把cheap cheap地的打線刀將d線打落粒Jack都得，或者叫d裝修師傅做都得，但係個人覺得佢地太粗手粗腳，做呢d弱電野唔夠溫柔。

上面成日講電話線同LAN線，其實呢兩種線的用料係一樣，係睇大家將佢拉去電話線位定係router而已。

下面有d參考的link，之前d 圖都係係下面copy出泥。

AMP

http://www.ampnetconnect.com/documents/New_Residential_Enclosure_DS.pdf

BELDEN

http://www.belden.com/pdfs/03Belden_Master_Catalog/21Residential_Cables/21Residential_Cables.pdf

Sony KDL-40Z5500 報告

呢部機的外型睇落都幾簡潔，由於佢唔係用LED做backlight，所以都有番三幾吋厚，但係用電量方面，就不比Samsung的LED TV高，都係260Watt左右，晝面前方可以話冇熱氣，機背都係有d熱，不過相比d olevia機頂盒同舊的plasma電視，已經算係冇咁熱，而家呢個天氣都可以接受，要到夏天先見真章。

先講買機，如果對d 大型連鎖店的禮物冇興趣的話，可以到www.price.com.hk格價，搵間最平去買都冇問題，最重要係問一問包唔包送貨。而Sony係會包安裝的，所以同邊間買都冇所謂，但係都先問有冇包安裝。本人就冇用到佢的安裝服務大，因為太容易安裝啦。以下兩張圖由說明書copy出泥，只要放個電視上個底座，再修四口螺絲，插天線同電線就攪掂，但係自己裝的話，就要多幾對手先得，因為個電視都幾大下。

追台果d就唔講啦，可以download說明書睇。

講番佢個200Hz 畫面啦。如果大家走去問d sales，佢一定問100Hz就夠，如果追200Hz的話，好快又出400Hz，你追得幾多，背後原因都係想大家幫佢買哂d舊貨去。而我個人覺得200Hz比100Hz都有明顯的分別。要睇呢個分別，就好睇大家睇咩節目，財經節目d即時報價係畫面下方不停飛，或者生態節目，個鏡頭左右掃睇風景時，200Hz有絶對的優勢，因為可以做到流暢而清晰，而100Hz就只係流暢。咁對睇的人有咩感覺呢~~~

50Hz 個影像跳跳下，會睇到頭暈

100Hz 流暢d，唔清晰

200Hz 流暢又清晰

不過呢個感覺只會出現係大呢吋的電視如40吋以上，細電視就唔會太大分別。

呢款電視可以自己選擇50, 100, 200Hz，所以可以叫店員show下，用同一部機感受下，容易d睇到個分别。而玩PS3再加上HDMI同200Hz，真係流暢到不得了。

而佢個dlna係經wired connection，所以要留番條線俾個電線先得。個係video只support *.mpg，用途不大。而睇相方面，顏色細膩，幾有現場感，但係佢load張相超慢，大約要3~5秒先出到成張相(由上致下出)，用slideshow就可能會好d，佢process好張相先係個screen show出泥。播歌都好好，聲音不錯，screen又可以入sleepmode。

update firmware一定要用電腦download，再save去usb，再插去電視度，所以有d笨。

畫面正下方有個發光的SONY字樣，其實set佢唔發光，所以唔使煩。

Euro Star Italia - ESI

如果話買左張Eurail Pass又想坐Euro Star Italia的話，會唔會好似Euro Star咁唔包呢?答案係唔會的，Euro Star 同 Euro Star Italia係完全唔同的野，Euro Star Italia可以理解為意大利的高速火車，只要上車前做番reservation就得，但係價錢一d都唔平，要10歐羅一個人，如果行情唔係太趕的話，就盡量避免啦，不過有d路線係冇得大家揀的，好似係威尼斯去佛羅倫斯或羅馬咁，全部都係ESI或者AVI的車，通通都要補番10歐羅。

下面張相係頭等車廂

歐洲火車時間

對上一次去旅行，internet都仲未普及，所有火車時間都印哂係一本書上，帶住本時間表，去到邊都check得到。而家本時間表仲有得賣，都係咁貴，但internet時代中，竟然係冇pdf版俾人download，咁點check好呢? 唯有去歐洲d 鐵路局網頁啦。

呢個係德國鐵路局網頁

http://www.bahn.de/international/view/en/index.shtml

一入到去就會見到下面呢個畫面，大家要input d日期，時間，出發地同目的地。

日期:因為不是班班車都係日日開，唔同月份有唔同安排，所以一定要入真確日期

時間: 想出發的時間，咁個網頁會搵番最近的車次。

出發地同目的地: 呢度就比較麻煩，因為一個城市可能多過一個車站，入名時可以只打城市名，之後都會show番唔同車站的result。又或者從網頁的suggestion去揀(如下圖)，揀果時最好再到google map check多次位置。

以下就做一個例子，於2009年10月9日上午10時由Paris 去Geneve。

下圖就係個result，

”Station/Stop”就係出發地同目的地，Paris個名會多左個”Lyon”，即係要到”Paris Lyon”車站上車，”Geneve”就係落車車站。

”Date”就係日期啦，有時d車行過夜或多過一日，所以上車同落車唔一定係同一日。

“Time”就係上落車時間，如果要到另一城市，最好唔好太夜到，否則很難找地方住。

“Chg.”意思轉幾多次車，最好係”0”，即係唔使轉，好似第一個result咁就係轉一次。

“Product”係提供服務的列車種類，好似寫住”TGV”，咁要俾留位費啦。

在剛才的”Station/Stop” column有個向下的箭咀，press左就會有個detail d gei information，要轉車的話，逐班車的時間都有show到，而”Products”果行就show左車次編號，上車都係認住佢最準，就好似飛機的航班編號咁，click個車次編號會show班車所停的所有車站，有時一班車會停同一個城市的兩個站，咁就可以再選d更好的車站上車。再右手邊就係班車提供咩野服務同要唔要留位等。