LED射燈

因屋企在買入後在幾處地方裝了射燈，但傳統射燈用電量高，又發出大量熱力，所以咁多年來都冇乜點用過d射燈。
早排就開始去搵LED射燈，發現售賣的地方很少，選擇就更少，有牌子的有萬佳美，東芝同奧的亮。係深水土步就仲會見到好多冇牌子的LED射燈。
大部份射燈的功率都在3.5W 至7W左右，但唔好睇少呢幾Watt，開耐左，個散熱罩都好熱下，但比傳統的好好多，至少唔會燙傷。

如果佩上傳統射燈，就要搵MR16規格的，尺寸大約係燈罩直徑50mm，電極距離6mm，電壓係12V AC/DC，亦即是要有火牛變壓先可以，而呢隻火牛對能否轉用LED射燈係好重要的，
以兩盞傳統射燈為例，總功率大約係35W x 2 = 70W，電流大約係70W/12V = 5.8A，
而LED的功率3.5W x 2 = 7W，電流大約係3.5W/12V=1.75A，
相差3倍多。有些火牛是用mutual induction的方法變壓，太弱的電流可能引至不穩定輸出，即係會閃得好勁同好暗，或者係完全冇光，而我就有一個射燈位有呢個問題而唔可以轉用LED。所以要試過先好大量買，否則就得物無所用，或者再花錢買新火牛。

價錢方面都差很遠，外國牌子的可以買到$150-$180一盞，香港牌子大約$100，無牌子的就好海鮮價，$30-$40又有，成 $100又有，但係就冇任何包裝或說明，本人都唔放心買。

我自己就係觀塘一間五金鋪買，奧的亮 3.5W 黃光$79 ，白光$89。暫時見到的缺點係光源太集中，行過燈下面會好唔舒服，所以要將燈射向牆身，用牆身反光出來，效果會柔和少少。

催生 BB - 仁安醫院

太太本來的預產期在六月三日，在第39週的檢查時，醫生安排左如果當日冇作動的話，都入院做一次胎監聽，即係在肚上放兩個sensor，一個check子宫收縮，一個check bb心跳，一次一個鐘，收500大元。

(圖中140係BB的心跳，34係子宮縮的程度，0-127,最高127，但係呢個數字只同個型號有關)

雖然睇到子宮有收縮，但不明顯，所以要番屋企繼續等。
再過多三日再上去做多次胎監聽，情況一樣，所以在第40周的檢查時，醫生約定在第41周催生，即6月10日。

所有在仁安醫院預約催生的本地孕婦會在早一日入院，我太太就係6月9日入院，在辦入院手續時要帶早前交了的按金單，職員會問入住的房間種類，一般所選的房間滿左﹐可免費升級，所以我地選普通房，最後入住雙人房，當然俾番普通房價錢啦。

仲有6月9 日係不另收費的，亦日不包括在順產套餐中的4日3夜中，可以話係免費。

為什麼要早一天入院呢，因為在12am時，會塞粒藥到子宮頸，令子宮頸放鬆。

到第二天(6月10日)，醫生8點鐘巡房，會檢查子宮頸情況及處方催生藥。9點多時，太太走路過去候產室，催生藥以打點滴形式流入身體。由於催生藥係引起子宫收縮的，所以生了bb都唔會拿走的，令生產過程完結後都可以幫助收縮。

開始落藥後，就不可以落床及飲食，大小便都在床上解決。而陣痛同時會開始，初時似M痛，可以輕易忍到，但兩個多鐘後就開始痛得要用止痛氣，即係笑氣(entonox)。

由9點幾到12點半呢段時間都有加快注入催生藥，護士亦把洋水刺穿，讓身體"意識"到要加快生產。但係一點時，bb的心跳在陣痛期間不穏定，醫生把注入量減至最低，待bb心跳穏定後再加藥，但一等就2,3個鐘，而期間陣痛變得不定時，但痛楚程度就更大，到三點多，太太要求打止痛針，打了後，成個人開始有d迷迷糊糊，而明顯睇到佢係好痛，但護士檢查後話只開了2度，即還有漫長的路程。及後護士重新加藥。

到差不多8點，太太痛到氣力都所餘無幾時，佢再要求護士檢查，有好消息啦，因為開到8度，這時己痛了超過10個鐘，可以轉到產房了。入左產房都仲要再等開到10度，這時的痛應該係最勁，因為吸笑氣都痛到成身不停震料，幸好只多痛十多分鐘，助產士話可以用力生，試左近30分鐘，才見到bb的頭髮，但係太太一次比一次更無力，只停在呢個位置，到下午9點15分左右，醫生到了，睇左太太用力兩次，就覺得太太唔夠力，就建議用吸盤。

醫生佢地用左5分鐘set好所以野，再把吸盤放到bb頭頂，即係塞左吸盤入去，到陣痛時，醫生就叫太太用力，醫生把bb拉出泥，一下就大bb的頭拉左出泥，護士立即用喉吸了bb鼻同口的洋水抽出，再下一次陣痛時，整個bb都拉了出來，前後就用左12個鐘。

醫生繼續處理胎盤同傷口，我就去了bb身邊，準備把過長的臍帶剪去，同一時間，太太由超辛苦的狀態回覆到平靜狀態，還可以有講有笑，拍照做鬼臉tim。