聖母無玷聖心幼稚園好唔好？

呢個六月到好多升小一的家長一樣，日日都係講叩門的事。

諗番成個揀幼稚園到揀小一的過程，畀我再揀一次，可能會有好唔同的諗法。

首先我想講下而家已讀完的幼稚園。

呀仔係讀聖母無玷聖心幼稚園的，當時有考慮過呀仔語文能力較慢，聖心呢啲老牌學校會唔會唔啱佢，但係咁啱K1、K2時的校長主張愉快學習，所以就繼續入讀，起初時都無乜問題，放學番屋企都有唱有跳。

但去到K3時又轉了校長，剛巧到了K3，幼稚園就開始了"小學生活"。首先是功課的模式，日日都有中英數共三至四樣功課，程度以中文最深，包括抄寫生字，用生字做句等。英文有抄生字，數學個位計加減數。

但到下學期的功課就已經係小學程度了﹐要寫家課日誌，中文做句，中/ 英閱讀理解(有時閱讀理解的答案要重抄一次)，中文重組句子，數學文字題等等。好大部份的功課都不能自行完成，變成咗係大人講，小朋友抄的情況。

而再睇番三年的幼稚園的生活，三年之間係互不相干一樣。學生只識得當年的班主任，完咗一年就無哂交流。做唔到一個大家庭的感覺。

而做這麼的功課有咩用?當然係接上小一的要求啦，但係要搞清楚一點，佢地做的事情只係接聖母無玷小學。

其實功課量也是其次，做不完家長可以"自行調節"，但在升小的過程，學校的支援可以話係極差。

首先，整間聖母無玷聖心幼稚園好似係為聖小而存在，小學部有什麼要求就會跟。

其二，幼稚園收生人數實在係太多，師生關係只限學生與當年的班主任之間，升了級就完全無來往，對校長就更加係零認識啦，到叩門時想要一封校長推薦信的話，幼稚園直頭話唔會安排呢啲嘢，大家諗都唔好諗，佢地只會出一張在學證明，即係好似大人辭職時嗰封工作證明的無謂信。

其三，因為真係太多人想入聖小，聖小的姿態就係你去求我一樣。比如第一階段，明知自己無宗教分，世袭分等，佢地都要求你入紙申請聖小，第二三階都必須放聖小，咁先畀機會有交表叩門。但係對家長泥講好難咁同佢玩，要家長押哂落佢身上，但只能做超級大後備，呢個機會成本真係大得過份。

學校旅行又係一個好可怕的經歷，學校旅行是分三日，每日一級。但因為一級的人數已經係超級大，所以學校就會搵啲本地旅行社承包，結果當然係又貴又無聊啦。就好似K3的安排，無啦啦要去沙頭角的農莊，大佬呀，成個場"爛容容"，是但行落個沙灘睇紅樹就話係景點，一時間個灘仲多人過旺角，跟住又話行入啲爛路(成條路係大過拳頭的碎石同沙舖成)，勁多細路跌傷，最後午餐可以安排燒烤場BBQ，真係收得貴又無節目，又無回憶，是但搵個郊野公園仲好啦。大家記住喎，年年都係咁安排啲食錢農莊同只做團的餐廳開飯。

如果唔係想升聖小，我本人不建議入聖幼。

AirComfort AC42103

本來諗住買左就算數，但係日日都對住把吊扇，真係好唔順眼，所以寫幾句，等大家可以留意下。

首先，部吊扇喺買之前係無得睇DISPLAY，全靠睇佢網頁，但係佢的描述同實物有幾大的差距。

1. 唔知佢係唔係真係賣去歐洲，至少佢的包裝、說明書同遙控上的寫都係簡體字，產品上全完搵唔到"AirComfort"的身影，而遙控除簡體字外、仲有個勁核突的LOGO，真係唔知佢想點
2. 佢個LED燈絶唔係LED燈泡，而係大陸LED粒，壞左的話，要去鴨記自己配。話就話有白光同黃光，但個白光的色域好窄，色溫極低，照到啲野好光，但睇唔到DETAIL的，真係會睇壞眼
3. 最後又最至命的，就係把吊扇開左等如無開一樣，啲扇葉完全係一塊板，無做弧度，只係安裝上個摩打時斜幾角就算，爬風能力極低，我問個SALES係唔係咁，佢話唔夠風咪開大啲囉!!咁個遙控得"慢、中、快"三個選擇，但係慢同無開係一樣的，咁大家要諗清楚啦。仲有就係個摩打同扇葉係無做調教，轉起上泥唔穏定，所以一定唔靜的。

我個人極不建議大家買呢間公司的產品，除非大家真係好想買平野啦!!

簡體字

買樓記 － 按揭

由於太無聊的關係，就係2015年呢個樓市高位買左第一層樓。中間的經歷想同大家分享一下，希望小弟行過的冤枉路，大家唔會遇到。

由於睇過新聞話有人傻傻下簽左臨先知申請唔到銀行貸款，最後要畀發展商殺訂，大家都知而家樓價咁高，一殺訂即刻唔見十幾廿萬，所以最好自己去問銀行可以借到幾多錢先。

http://www.hkma.gov.hk/chi/other-information/pws-faq/banking-stability.shtml#j1

以下係要留意的地方

1. 銀行估價
2. 按揭成數
3. 自住與否
4. 壓力測試

銀行估價係根據市況對物業作出的估計價值，準則通常係同一屋苑的成交價，一般貸款申請會以估價及成交價的低者作準。比如成交價係470萬，但銀行估價得450萬，咁相差的20萬就要買家自己諗掂去，仲要呢20萬係不包括在下面講的首期。

呢個估價間間銀行都有少少唔同，呢條LINK係匯豐銀行的，24小時開放，如果個經紀無啦啦捉你去睇樓，隨時可以CHECK到。

https://www.hsbc.com.hk/1/2/chinese/hk/mortgages/valuation


700萬以下按揭成數已減至最高六成，通過按揭保險計劃下，最多可借到最高八成(樓價為450 萬至600萬以下)，而樓價450 萬以下則視乎情況可借八成至九成(這樓價的可借成數比較繁複，必需問清楚銀行職員)。

按揭保險計劃的保費亦係貴到不得了的消費，叫做消費係因為畀左出去的錢只係換取可以申請較高按揭成數而已，萬不得已先好行呢步(雖則四成首期真係好惡頂)。咁保費點計呢?大家可以参考下面條LINK，

http://www.hkmc.com.hk/sites/default/files/chi/pcrm/ourbusiness/Annex-1-Chinese.pdf

"一次付清保險費"就係個保費比率。例如:

樓價 = 450萬

按揭成數 = 八成

年期 = 30年

咁個保費比率就係2.15%，咁保費就係4,500,000 x 80% x 2.15% = 77400，記住保費係以總貸款額計算，而銀行職員有提過2.15%係保費上限，如果紀錄良好，可能會平少少，但我最後無申請到，所以要大家試下先知啦。

呢幾萬蚊可以一炮過畀或者再同銀行借，後者的話，貸款額就成 4500000 x 82.15%了。好處係首期少左，壞處係供到死死下，同過唔到壓力測試。

如果大家唔係自己住的話，按揭成數就會下降到五成，但銀行會發一張出租同意書，咁就可以合法放租啦。以2015年5月的情況，銀行職員話利率都係一樣。

最後到壓力測試，呢個係每月供款額同入息的比例要求，呢個要求係由金管局提出，所有銀行都係跟足的。以自用物業為例，會用當時申請時的利率計算，供款額不可高於入息50%，然後再假設利息上升三厘，睇下供款額可唔可以少於入息的60%，如果唔得，仲可以加多個擔保人一齊計，記住只計基本月薪，未扣MPF的銀碼，但佣金、雙糧係唔計的。

去到呢度，大家應該明白，上車難在兩個地方，一係唔夠首期，一係過唔到壓力測試，最後要買樓的人走哂去買細價樓，攪到細價樓升到唔停。

按揭優惠

一般銀行會提供貸款額的1%作為現金回贈，而1%又係金管局的規定，所以間間銀行都會畀，咁銀行點搶生意呢?就係畀其他優惠囉，主要分超市現金劵，存款掛鉤-即係可以放貸款額的一半的現金入銀行再收番等同貸款利率的利息，變相減息一半。但前提係你有咁多現金享受到啦，此外，要享受的話仲要轉哂所有出糧戶口，開信用咭，自動轉賬等等等等等.......的服務，簡單啲講就係跟住幾十年都要乖乖用同一間銀行。

德國咪錶位

如果大家選擇泊車路邊位的話，就要搵下有無咪錶，同香港唔同，個咪錶係成條街或成個場一齊用，而部機係賣飛仔，入錢後會印張「最後泊車時間」飛仔畀你，跟住放番放飛仔去擋風玻璃下，咁就可以係飛上時限前泊車，過會被抄牌。

而收費放面部部機都有唔同的，通常分全日收費同最低收費，最低收費可以係15分鐘，或30分鐘，所以要查下字典，睇清楚點計。而機上通常有四個制，係「➕➖✅❎」，➕➖係畀用儲值卡用，我地做遊客就應該用唔到，要用時就先入硬幣，螢幕會顯示最後泊車時間，唔夠的話就繼續入，到顯示的時間到你想要的時間後就可以㩒✅，咁部機就會出飛仔，記住部機係唔會找錢的，所以要留番啲面值細的硬幣最後入。

另外有啲唔多人用的位會無咪錶買飛的，需要出示一張「parking disc」，張紙可以問租車公司攞，或者到超市報紙檔買，好似係一至兩蚊歐羅，要將個指針對住離開車的時間，以半小時計，如果的1:15離開，就轉到去1:30，咁就可以泊兩個鐘，即係3:30前要番到車上。

德國自駕遊

小弟第一次的自駕遊，目的地係德國。

首先就係要做足功課啦，去到先知準備唔夠就煩啦。

去得呢啲地方，路線計劃一定係最重要，我就用GOOGLE MAPS做参考，計下點到點要用幾多時間同里數，途中要住的酒店有冇包泊車等。

酒店方面，我就主要睇bookings.com，佢地有mark到酒店的泊車設施，但係見到"Free!"都唔好開心住，仲要睇佢係private定public，public即係叫你泊街邊，有機會要入錶或被抄牌，有啲就講明private要收費，價錢就睇間酒店係咩位置，大城市的市中心一日都收番你€8 ~ €15，有啲可能再貴啲，有時呢個差價，已經可以搵啲遠少少，但好半級的酒店，既然有車，當然唔好入城住啦。

人同車都有得住的時候，就要諗下渣咩車啦。

第一個諗起的難度係當地係左軚車，所有方向同香港相反，開車時當然要多加留神。另外要注意當地人多數渣棍波車，所以租普通車的話，通常都無得你揀，一係係香港搵個師傅操番轉，一係就忍受下個一租車價但差少少的車款。如果大家只學過貨VAN棍波牌的話，必先練習好才出發。

上圖係sixt.com 的SCREEN CAPTURE，睇佢係唔係自動波就要睇()內第三個英文字，M=Manuel, A = Auto，詳情可睇http://en.wikipedia.org/wiki/ACRISS_Car_Classification_Code。

至於駕駛執照方面，香港車牌可以直接係果邊用，但只可渣三個月，而接連德國的國家大多都要國際車牌，以及租車公司的職員好似唔多熟香港車牌，如有國際車牌可減少誤會，去的地方又可以自由啲。(對於直接可用香港車牌呢點，大家要自己出發前再確認，因而家好多大陸人免試換香港車牌再到外國渣車的)

行車里數都係要留意的地方，上圖就寫住UNLIMITED，但就唔係間間都係咁的，有啲係一日約400公里，夠唔夠用就要諗下自己去邊。

上圖的價錢只包租車價同一般三保，所以仲有好多野要加錢買。好似全保咁，分有塾底費同無塾底費咁。多一個司機梗係又要畀錢啦。而導航就真係必不可少的，佢地的導航有UPDATE的路面情況，修路、多車、大霧都會提到你，或行行下改路線避開。重要一提係唔好靠GOOGLE MAP同APPLE MAP等網上地圖，因為好多地方都收唔到DATA，萬一MISS左個路口，電話BUFFER左的地圖會唔夠用。

去德國渣車當然係為左佢地條Autobahn啦，無限速嘛。但都只係睇路段，唔係成條Autobahn 都係無限速。以下有幾點要留意番。

1. 時刻留意有冇時速限制的路牌 - 影響因素包括本身路面設計、天氣、修路工程、或交通意外等，導航系統所顯示的未必最準確。
2. Autobahn無明文只要求最低時速，但習慣不低於時速80公里。因為行慢線的大貨車的行車上限係80~100km，如果你慢過佢地，一定忍你唔到。
3. 係交流道準備入Autobahn時，首先當然係睇車啦，就算無車都好，至少要加速到80~100公里先好cut入去，免得後車要收慢忍你。
4. 如果你已經係高速又見到有人要CUT入去慢線，係Autobahn入面的車都會Cut過去快線，讓出慢線畀其他車入。(大家要將第3同第4點一齊想像一下，就會諗到入口位車同車之間係點即位，要做到人人唔使踩BRAKE)
5. 如無超車，必需靠右線。就算有3條線都唔好霸住中間。而好多路段都只得兩條線的。
6. 德國朋友話跟車太貼係死罪，比超速罰得更重，但幾重我就唔知啦。路邊有啲有反光貼的石柱，柱同柱之間係50米，如果行到時速100公里，至少要有兩條柱的距離

至於交通燈方面，都有啲麻煩位，係大城市入面，大多數都係"紅黃綠燈"，而郊區就有啲係"紅黃燈"。而係燈位右轉要格外小心，有啲地方可以唔使睇燈，有啲地方就要，視乎咩當區的法例，咁我地咩都唔知可以點做呢? 一係跟前車轉，一係照等到有綠燈先轉，但轉果時都要睇下有冇人過馬路。千萬要記住，當地行人同單車都好信任駕車人仕，佢地係唔識得避車的!!!!

"紅黃燈"好多時係的冇乜過馬路的地方出現，平時係咩燈都唔著的，到有人按燈柱上面的掣時，佢就會出黃燈，再到紅燈，行人燈轉紅後，車燈又會冇哂，可以照開車。而呢個情況有時都會出現係"紅黃綠燈"上，即係綠燈著得太耐，都會熄左綠燈的。見到交通燈時要有心理準備。

請CLICK下廣告支持下小弟

如果大家覺得小弟寫的BLOG可以幫到大家的話，請CLICK下啲廣告，謝謝!!

Miele S 6240 吸塵機 Vacuum Cleaner

我諗大家放到啲大型電器店見到啲吸塵機真係好頭痛，呢DEMO機放到滿哂，又話有塵袋，又無塵袋，又有啲充電，又手提，真係佢有佢講，我地有我地唔明。

所以要上網睇，最先留意到啲歐洲牌子，好似Dyson, Rowenta 同Miele，可能因為俾電視廣告洗左腦。

首先講下冇買的牌子先，最唔掂就係Dyson，大家係電視見得最多一定係佢，但係去到百記叫PROMOTER一開機睇睇，即刻可以叫佢關機，事關實在係好嘈，我諗大家都有入過百記，好多電視音響開哂係度俾人聽，係咁嘈的地方都聽得出部Dyson吸塵機嘈，咁真係幫佢唔到啦。至於點解咁嘈，估計同佢個吸塵機體積有關，做到部機咁細，即係風扇扇葉都會做細左，要保持大吸力，就必定要加大轉速，轉速一高就一定嘈。所以Dyson一開始就OUT了。

本來想買Rowenta，因為屋企有部Rowenta暖風機都唔錯，好似幾靠得住。今次去左兇宅睇，實物睇上去有啲大， 而佢得一個可轉方向的輪，轉向比較鈍。至於佢個SILENT的MODEL就唔好比廣告坤到，廣告就話隻貓唔怕比吸塵機嘈到，個吸塵機又好似完全無聲咁，實情只係比其他MODEL細聲啲，隻貓係驚開的，都會繼續驚LO，就算係YOUTUBE睇ROWENTA AUSTRILIA的廣告，吸塵機的聲都係不正常的細，所以覺得佢地信唔過，另外就係佢個V形拖把，係屋企真係唔覺有咁多死角要用到呢把野，所以冇要到。

最後就係Miele啦，買Miele都係因少少貪大牌子，以呢個牌子的產品來講，吸塵機的價錢最大眾化，部S6240有兩個地方比較吸引，第一就所有Miele吸塵機都有的，就係三個輪都可以轉方向，係屋企點吸，部機都"追"到我，唔使刻意拖佢行。第二個好處係就夠靜，比ROWENTA再靜啲，開機後，拖把入風位的風聲仲大聲過靜吸塵機的聲，咁的水平小BB都唔會太驚。另外就比較瘦身，唔用時，隻喉可以繞係拖把上，企直後幾慳位，睇得出個DESIGNER係有自己用吸塵機的。另外佢呢個MODEL仲有送個木地板專用拖把，用料豪華，但係好似好重，我就重未開過來用。

分享
去電器店揀機，唔好俾佢地放係架上的吸塵機騙到，因為部部都未裝拖把，睇上去好似好細，但到實際用未必一樣，真係要店員安裝一部完整的來試。如果係充電手提式，更要用手拿住10分鐘，試下係唔係真係夠輕。

香港保護兒童會-學心幼兒學校

仔仔係2013年9月入讀香港保護兒童會學心糼兒學校的N1班，又被叫做兩歲班、學前班等等。寫呢篇主要分享一下自己同囝囝的個人經驗，等大家了解一下成個過程。

報名
囝囝係2011年年中出世，算係受雙非B的影響，好不容易捱完坐月的第一個月，即刻就有人提要報名兩歲班，但係當時無留意，拖到囝囝八個月時才交表，而當時係冇雙非B報名的，主要問題係來自學校。由於六歲以下的小朋友處於高速成長期，就算只差幾個月大，個人能力上都有幾明顯的差別，而糼稚園受唔受歡迎就靠睇有多少學生能進名校，引致幼稚園偏向收年頭出世的BB，而佢地用做方法很簡單，就是没有報名時限，只採取先到先得的方法收表及篩選，由於報名時要提供出世紙，所以年中出世的BB交表時，老師都會話冇位了，但都會收你的表作為後備，而年尾出世，就只能等K1了。

幸好香港保護兒童會學心糼兒學校安排面試没有以上所講野情況，所以有面試機會，而面試時囝囝得歲幾，所以問題主要圍繞一些生活習慣，即係IN家長多，小朋友肯坐定定玩玩具就OK，當時仔仔都未識講野老師都收。

開學
番學前當然要準備校服，如果搵到有舊校服當然好啦，因為細路仔大得快，二手衫都唔會太差，而新的都唔貴，一套夏季先$7X，全部買哂全新都只係三四百，白鞋就要買兩對，一對係校內，一對係校外著，另外要買多個水樽。

講咁耐終於要番學啦，由於兩歲小朋友要多啲照顧，番學果時都係分批入學，第一批係八月中，第二批係九月，第三批就視乎出世月份，因為要足兩歲先可以番學，所以班同學係愈來愈多的。咁呢個學校係全日班，頭三日番兩個鐘。

第一日家長陪足兩個鐘，小朋友就唔知咩事，好似番PLAYGROUP咁，所有同學仔都好平靜。

第二日的頭一個鐘都可以有家長陪，第二個鐘呢，老師就會叫家長靜悄悄咁離開學校，一個鐘之後接放學，佢地做乜就唔知啦，但係到接放學時，個個哭到好大聲，叫仔出泥時就冇大喊，但就見番面時，又想再喊過，見到佢個樣時眼濕濕想再喊，真係好肉赤，叫咁細個BB番學好辛苦佢咁。

到第三日家長唔可以陪，而仔仔開始知唔對路，知道會被賣豬仔，對番學開始反抗，唔肯換衫，唔著鞋，又唔行路之類，見到學校就喊，但係無計，決定左要番學冇得心軟，去到學校個個都生離死別咁啦，都係放低走人啦，兩個鐘後再接，咁佢都係咁上下反應。

三日後老師睇情況加鐘至半日、食完午飯、再到全日。起初老師話仔仔係分開果一下喊，之後就抱住老師的腳，唔肯坐自己的位，唔肯聽指示。所以頭兩星期都係番兩個鐘及半日。

一日又一日咁過去，日日番學都見到第同學仔喊，到而家三個月都係，如果大家小朋友都有咁的反應都唔使擔心。到一個月左右，老師打電話話可以番全日時，真係有啲高興，不過番左全日後又有其他問題，好似一放學就要求食野，仲要食一個正餐的份量，另外就好眼瞓，要求番到屋企瞓晏覺，奇怪的係其他同學都一樣，大家難免會覺得學校有問題。

食飯瞓覺的小問題外，就係病啦，仔仔平時算病得少，但係番到學校幾勁都冇用，傷風咳就少不了，放學時好多同學同仔仔都係成面鼻涕，仔仔就咳來咳去，成兩個月的今日都冇停過，一轉天氣又新一輪請病假，太厲害的話，老師都會叫家長提早接走。

其實番左學成三個月，仔仔變得多野講，識得唱歌，背番啲課文，原來唔一定要怪獸家長先做到，普通學校都可以教到佢地。另外係番全日班時差不多經歷左一整日的生活，例如番到學校坐一陣就食早餐，跟住上堂同玩，到食午飯，又再午睡，起身又玩過，好多野都要佢地自己做，成體驗都完整好多。

講番一開始番學時，小朋友又流鼻水，放學成塊面都花面貓咁，其實真係要小朋友經歷過才長大，當然我地會覺得因咩事學校冇照顧好個小朋友，但反過來諗，師生比例再好都係1:9或1:10，點都冇可能好似係屋企咁幾個大人照顧一個小朋友咁好，所以花多啲心思教識自己小朋友照顧自己比怪責學校來得實際，同時唔好因呢啲小問題而放棄個學位，因為番幼兒班學到的野真係好多。

聖母無玷聖心幼稚園-面試2013/11

小兒係2013年11月2日到聖母無玷聖心幼稚園進行面試，記謹於面試時間提前15分鐘到達，因為第一部份正是在這15分鐘進行。

學校的交通不方便，好多家長都開車都學校及在校門口違例泊車，附近屋苑會報警的，大家一定要有人睇住架車或停在附近停車場。

講回面試，第一部份是被稱為"等候時間"，學校安排左滑梯，小籃球架，小隧道，海綿積木等大型玩具畀小朋友"玩"，過程中有十多名"員工"在旁觀察，由於小朋友身上都貼了報名編號，那些"員工"都會按情況填寫手上都表格。過程中可能(個人估計)會觀察小朋友有冇排隊玩，同其他小朋友有冇交流，大肌肉的運用，家長有冇引導小朋友玩不同的玩具等。而我個仔就只肯玩小籃球架同睇風扇，所以表現真的一般。

15分橦後，就會安排入房見老師，一間房有四張枱，一張枱有一位老師，一位老師會同時接見兩位家長及其小朋友。

一開始就給小朋友一張畫紙同畫筆，叫小朋友自由畫東西，當然我個仔係亂畫一通啦。
之後老師再展示一個組合了的玩具，另外小朋友會各自有同一個玩具，但是未組合的，老師會要求小朋友跟著組合一次，而我個仔同另一位小朋友都係做唔到的，但係我一啲都唔覺得係小朋友的問題，因為個玩具係咁的，首先是一塊白色蛋形的人，上面有三個洞，配件有四塊，頭三塊是有顏色的頭髮、領帶同褲，要將呢三塊正確地組合到白色蛋形的人身上的洞內，然後再插上第四塊配件上，第四塊配是一隻鞋，插好後，白色蛋形的人就可以企係度。我一見到件野我就問老師可唔可以幫下手，老師就話唔得，咁我都放棄了。

枱上還有一些類似LEGO的積木，但係我地都冇玩到。

問題方面，會問家長點解想讀呢間，平時邊個照顧小朋友。另外會問小朋友叫咩名，幾多歲，大大聲答，快而準當然會好啲啦，但係我個仔都冇咁做，怕怕醜咁答，最後老師會送番一包餅或珍寶珠俾小朋友，記得講多謝同BYEBYE。

Club Med Kani Maldives 馬爾代夫 - 膳食

今次講下Clubmed入面的膳食，係島上Clubmed係包哂三餐

住Superior Room 同Beach Villa係餐廳食自助早餐，但係我冇食過，所以唔多講。
住Lagoon Suite的朋友就可Enjoy Room Service的早餐，要記住只係早餐哦。基本上執房的靚仔日日都會放一張早餐紙係房，夜晚填好再放係門外信箱就會有人收。

早餐紙唔係咁易填，首先填1人定2人，1人的話，所選的食物只提供一份，2人的話就兩份，如果有些食物大家想食，有些又唔係，咁就要自己加REMARK。

至於食物呢，我就建議西式會好啲，即係薯餅，煙肉之類，而煎蛋會係必選，麵包都可以點一份，兩份就一定食唔哂的。

我喺其中一日選了亞洲早餐，有粥，有湯飯，外觀還可，但係超難食，可以話係用冷飯做的，試過一次，後悔一世，希望大家去的時候，唔再係呢個廚師。

至於午餐同晚餐，都係出番去碼頭邊的餐廳，都係自助餐，同樣亞洲食物都係超差，中國菜就只係得個咸字，日本菜有時煮肉，但就係醬油煮肉，無香味的，有陣時都有Sushi，但係佢地個包法好怪，會先用浸軟左的米紙做底，上面放紫菜，再加飯同吞拿魚，卷出泥係超"林"哂，唔好食的，可能呢個係西式的包法，鬼佬可能唔覺有咩問題，但就唔多見日本人排隊等。

海南雞飯，但係有形無實

中式炸醬麵，除左咸味，就乜都食唔到  

這款係好咸的蔬菜湯加辣椒，但係就寫上"冬蔭公湯"的名

中式同日式都唔好的話，咁仲有咩好食呢，就係西式意粉同印度咖哩比較好，西廚做的汁好香，仲有就係佢好俾心機煮，而佢都好想大家用心去食，咁講係因為有個大陸人夾左一碟白汁硯肉意粉，之後想去加茄汁一齊食，個鬼佬西廚唔俾佢加，咁個大陸人俾佢嚇走左，鬼佬就好激氣咁同我講邊有人咁食GA，攪到我只可以答佢呢個係中式食法。除左意粉，其他都係以魚為主的菜式，一塊魚柳就已經能食飽一個男人，因為呢度的魚條條都幾呎長，點切都係好大塊。

有時會有特別的飲品招待，午晚餐有紅酒白酒無限供應

左邊的係芝士粉，右邊的意大利粉好好食，好快就會得番個吉碟

日日都有唔同的裝飾品

餐廳環境唔差，但係就冇冷氣的，中午時份都幾熱，要多飲水同唔好食太辣的食物，咁就唔使食到流哂汗，晚餐時就試過係喺沙灘食，環境氣氛都很好，好有渡假FEEL，而唔係去普通餐廳食飯咁。

沙灘晚餐時，GO有唔同的打扮，增加氣氛

火腿山

最長的係劍魚，雖然係好新鮮，但係佢地唔會即日煮

沙灘上的座位，員工花了一整個下午做擺設

Club Med Kani Maldives 馬爾代夫 - 潛水

係Clubmed個Package入面，有兩種潛水可供選擇，一係無限次免費出海浮潛(snorkeling)的，二係額外付費的水肺潛水(Scuba Diving)。而我就兩種都有Join到。

先講出海浮潛，其實一日只有兩次，分早上(約九時半集合)同午餐(約二時半集合)後，潛水眼鏡同樸都係有得借的，但一定要記得帶太陽油。到碼頭集合後，他們會要求第一次參加的人客穿上救生衣到碼頭一旁進行約三十米游泳測試，過關才可出海。

浮潛位置由GO決定，一般視乎天氣，風向同水流而定，
有時同一天兩次都係到同一地點

簡單講解注意事項後就會上船出發，霸個好位就可以當遊船河，船程大約15-20分鐘，雖然唔算大浪，但都有見過國內同胞暈船浪。

通常都有2艘船一齊出發

去到浮潛地點後，戴好所有裝備就跳海開始浮潛，一次要游45分鐘，所以都幾要求體力。

浮潛位置通常係啲礁石，一邊淺，一邊深，咁就最多野睇

如果穿傳統救生衣，就只可以浮。
如相中人穿吹氣救生衣，就可以潛

跟住講下 水肺潛水(Scuba Diving) ，呢個就係用氧氣樽潛水，服務由EURO DIVERS提供，收費就分新手同已有證書人士，新手就以COURSE計，最平是半日，包講解裝備同潛30分鐘8-10米深的岸邊，都可以睇到唔少珊瑚同一呎多長的魚，期間有教練陪同，同測試儀器，如脫了呼吸器後如何重帶等。貴一級的COURSE就可以出海一次，都係同日下午出的，我就到了15-18米的地方， 可看到珊瑚同魚的數量同品種都多很多。收費都高很多，半日收USD90，全日收USD241，還要再加GST。

已有證書的朋友就平好多，主要有以日計的收費套餐，逐次計都有，但係因為冇得JOIN，所以冇睇到幾錢。

跟住教練游，佢地日日出海，都知啲動物住邊

一家人

超過一米長的海龜，可以去到好近同佢拍寫真

Club Med Kani Maldives 馬爾代夫 - 旅程, 房間

以下時我到馬爾代夫的FLIGHT SCHEDULE，馬爾代夫慢香港3個鐘，所以到機場的時間大約係香港時間的下一日凌晨三點。新加坡也有早上到的航班(不是天天出發)，但是要在新加坡機場過一晚。

24/03/2012 Hong Kong/Kuala Lumpur MH073 14:35-18:20
24/03/2012 Kuala Lumpur/Male  MH177 20:40-21:55
吉隆坡機場雖然係Skytrax有很高的rating，但係冇咩野行，上網又慢，所以等轉機的時間都過得幾慢。

吉隆坡機場內的KLIA Jungle，不用5分鐘就可行完

到馬里機場(Male Airport)後，不用急於過關，因為找到Clubmed員工後，他們會在對名後再等齊差唔多時間航班的客人一齊上船，大約要等20至25分鐘才走到碼頭上船。當日風平浪靜，可嚮受海風同睇滿天的星星。航程約30分鐘，到達時間是晚上11點多，島上還有GO歡迎，他們先帶我地到Manta Lounge休息，這裡只招待住Lagoon Suite 的客人，其他人會俾"實Q"趕走。

Manta Lounge, 只一個HEA的地方，有無限小食飲品供應

GO在Manta Lounge講解下飲食安排後，不用Check in就可以到房間去，一開門當然會"嘩"啦。房間在中間的位置，不用在橋上走太遠，走太近也有別的問題，之後再傾。

支香檳都幾難飲，無飲慣都可以唔使開，
其他飲品杯面係任飲任食的，隨時可以叫人加

向住海的大床，食早餐都係坐係呢張床度

好唔環保地浸左一次，小心其他房的人偷睇哦

  

早上起來睇到的景色，藍天白雲就在眼前

住得近岸就會好似呢幾間房咁，變左陸上屋，一定灰爆，
至少要要求轉房

Club Med Kani Maldives 馬爾代夫 - Booking訂房

Travel Period : 24th March 2012 - 28th March 2012

就由Booking開始講起今次的馬爾代夫之旅，我同太太結婚兩年了，小孩子又六個月大，就同太太相量過多一次蜜月旅行，仔仔就留係屋企了。結婚時去了歐洲三個星期，今次就選了另一熱點 - 馬爾代夫。

早知道馬爾代夫得兩種事情做，一是百無了賴曬太陽，二是水上活動，行街SHOPPING就唔會有的，所有選了CLUBMED，她的全包假期概念就滿足哂馬爾代夫的環境。

馬爾代夫CLUBMED的package係6日4夜，價錢有分包機票同唔包機票，而包機票的價錢又未包括機場稅，燃油費等，唔同的出發日子都會唔同價，所以要到CLUBMED網頁睇清楚。PACKAGE又有分三種唔同的房，最平的Beach Villa, 中價的Superior Room到最貴的Lagoon Suite(俗稱水上屋)。最平同最貴的房可相差五六千港元一個人。就算同一間房，唔同日子都可以差超過一萬港元一個人。

如果是新婚渡蜜月，仲有送簡單SPA。

而PACKAGE包的機票是最平等級的ECONOMY CLASS，如果賣哂，又要再加錢UPGRADE張ECONOMY CLASS去貴啲的ECONOMY CLASS機票(至少又加多HKD1000一個人)，所以選出發日子是很重要的。而航空公司有馬來西亞航空同新加坡航空(但係到寫BLOG時只有新加坡航空)，即是要在吉隆坡或新加坡轉機了。


由於太太堅持要住最貴的Lagoon Suite，曾經因為價錢太貴(約HKD23000/head，未包所有surcharge)而想轉去日本，隔了約一個月，見到CLUBMED出左PROMOTION，一個人的價機減到HKD18840/head，所以就決定豪番次，我BOOK的時候係2012年1月左右，公司請假又易，我就先選最平的日子，再找最平機位的日子，及回程時停吉隆坡三天，所以要多付吉隆坡機場稅。





(Clubmed 圖片)

出發前的支出是
Clubmed Lagoon Suite Package HKD18840 x 2
Clubmed Membership                HKD240 x 2
Surcharge + Airport Tax             HKD2515 x 2
Total                                            HKD43190

所以要Join Clubmed就最好多預時間等優惠，唔好急於一時而book了貴PACKAGE，因為BOOK得平同BOOK得貴，CLUBMED都係俾番一樣的服務。